May 31 2006
連環恐怖事件簿
連續三日都發生左一d恐怖事件
而且一般情況都唔會發生
仲要最慘係一次比一次恐怖…
星期日:
由市中心搭的士返屋企
正常都係響鄉事會路左轉上橋
響屯門公路往荃灣方向個路口行落去啦
咁0個日個的士司機就本身正常速
咁會先到往元朗方向路口再到荃灣方向入口
兩個路口都有燈位
由於距離短而燈位唔一致
司機都會較慢起步
但當到達荃灣方向路口時
司機停左響路口
我亞哥開口問: 司機, 你想去邊呀?
司機冇反應
之後司機開前左少少, 又停低
我亞哥再問: 司機, 你想去邊呀?
司機都係冇反應
之後一陣間後佢響佢右耳拎左d野出黎
但我睇唔到係乜, 佢就開車前行
就開始講: 唔好意思, 應該係頭先個路口
main point係佢冇對住任何人講, 係自言自語0個隻
我亞哥再問: 司機, 你想去邊呀?
司機繼續係冇反應
之後佢響一個唔可以u turn燈位夾更u turn左….
恐怖位係, 個司機好似完全唔意識到有人響車度咁….
星期一:
話說呢晚出左去食飯
咁間酒樓門口就接住個扶手電梯啦
當時我搭緊扶手電梯啦
個知客問我有位未
咁我就做口型講: 訂左位
個知客完全冇check
就話: 馮生, 呢面丫
咁我就好奇怪, 雖然都耐唔耐會到呢間酒樓飲茶
但未熟到知我姓乜丫?
諗完就搭完扶手電梯啦
一入到去就知道原因…
皆因全場都冇客!!! 應該只得我地訂台!
呢間野唔差丫, 好恐怖呀
到走時成晚都係得5台人!
唔好執呀!
星期二:
又係夜晚
話說就尋晚我八點幾開始整網站
之後好專心整啦
到十點幾十一點
響窗口度傳出左d鬧交聲
咁冇為意啦
之後就聽到好似有d唔對路
當中涉及一個亞仔, 一個亞爸, 同一個亞媽(我估計)
每隔一陣就傳出好激烈0既鬧交聲
掟野聲, 推低d家具聲, 同再激烈0既鬧交聲
越黎越覺得唔妥,
想搵聲響邊傳黎又聽唔到
係唔係我幢樓都唔知, 上定下又唔知
管理處電話我又唔知…
咁冇辦法啦, 唯有再留意一下
之後聽到亞仔講: 你殺左我丫笨!
我就唔知點好, 心又開始有d亂
再一陣之後冇哂聲….
嘩, 唔知咩事呀!!!
好恐怖呀!!!
死啦, 連續三晚都有恐怖野
仲一次比一次恐怖
今晚唔好再黎呀!!
