blogger luvul

又一個生日飯聚(查實唔一定關生日事0既~~)
雖然只係一餐飯, 但今晚真係好開心
一路食飯一路傾計, 無拘無束咁傾~~
由七點幾傾到十一點~ 哈~~
有人同你傾傾傾~ 而且仲share左好多野我聽添~~
感動~~  幾時再食飯呀~~~
期待下次飯聚~

早幾日九龍皇帝病逝
呢兩日就皇后碼頭被我地不知所謂的政府清拆
皇帝皇后如同月駕崩, 前所未聞!
我唔明點解我地香港政府可以咁
如果拆得皇后碼頭, 點解唔一齊拆埋大會堂?
呢個係一體建築群!
皇后碼頭就不如搬上山頂, 又係旅遊區, 又唔會阻交通, 又唔阻經濟發展
而且仲可以做出全球第一個唔響岸邊而係山頂0既碼頭!
應該全世界0既media都會報導香港政府係幾咁冇智慧!

早兩日行過灣仔利東街一帶
睇住一個好悲哀0既結局
0個幢當舖淪為即將開業0既cafe/餐廳
建築物後面就已經完全被蠶食
之後0個幢大廈更加高到不見天日!
全完唔match!
後面另有一幢舊式建築更加慘不忍睹
附近圍全0既建築物全部拆哂
係得返佢一幢, 左右後全部都係0個個”豪宅”項目
變左佢係一個阻住地球轉0既入侵者咁
咁不如拆左佢啦, 見到就覺得心酸

香港就係咁, 一幢一幢將有意義, 有背景, 有人情, 有需要0既建築遺棄
將佢拆得就拆, 改得就改, 總之就要令佢變得有經濟價值先可以留低
咁不如簡單放個炸彈將成區炸哂佢再起返一百幾十層0既豪宅同商業大廈群啦!

一套等左好耐0既電影, 係一套紀念唐山大地震30周年0既電影(其實今年係第31年)
唔知點解由當年讀書時睇《唐山大地震》後就有個情意結, 好想了解更多
套戲估唔到會係咁長時間, 由30年前講到今時今日
本身套戲係幾好
但就personally唔係咁鍾意導演將個focus放左響年青一輩度
雖然我明白導演咁做0既目的
但係就覺得focus係應該響老一輩身上
另外就對之前0既交代略嫌不足, 應該響地震發生後鄰里0既反應
令主角們0既關係扣得更緊
當然, 呢套戲都做得好好, 係有d小問題, 或者係小瑕疵咁
機會難得, 淨係得返幾日響灣仔art center agnes b cinema做咋~
原來今日睇0個場係首映, 見到好多人捧場呀~
而美中不足係坐後一行0既人不停咁大聲講野咁去交代劇情我聽
其實冇左呢d人會投入多好多!
主題曲”但願人長久”由張學友重新演繹, 亦都唱得好好~~~

相關網站: Offical Site

突然間好想買返呢幾套碟, 知唔知邊度有而又比hmv平d?
1.《孽子》
2.《盛夏光年》
3.《The Amazing Adventures of Morph》

查實呢三套劇/戲都睇左, 但就真係好想keep得返
得閒再睇下0個隻
如果有人知邊度有又平0既講我知丫~~

今日有兩樣新玩具
希望可以幫到更多啦~~

今日一睇到一個blog就得悉一個消息
“再見．曾灶財駕崩”
九龍皇帝曾灶財於十日前因心臟病病逝, 享年86歲
講真, 唔知有幾多人仲睇得過佢0既真跡
但我就見過佢本人幾次
最後一次印象見到佢時已經係五、六年前
當時佢已經行動非常不便, 左右脅都撐住柺杖, 仲要響電箱上面寫字
先不談佢寫d乜, 但係見到咁0既情景都幾心酸
一個孤獨老人仲要風吹雨打咁去做自己一直堅持左咁多年0既事
好佩服佢0既精神
即使佢做愚公移唔到座山, 改變唔到世界
但我覺得佢係一個心中好傳奇0既一個小人物

早幾日響書展某booth買書, 送左一個印滿曾灶財0既墨寶
或者呢個就係緣, 即使響街邊已經冇哂佢所烙響電箱, 燈柱, 橋墩0既印
但係佢0既事跡就永遠烙響每個人0既心入面

集體回憶又少了一角

響網度遊下遊下, 正要搵下台北有乜hip (boutique) hotel
比我發現到個超正0既台灣酒店集團!
呢個酒店集團叫”The Tango Hotel 柯旅天閣”, 共有四間分店, 分別係:
Taipei XinYi 台北信義
Taipei LinSen 台北林森
Taipei NanShi 台北南西
TaiChung 台中
當中以信義店最靚~ 真係好想下次去台北可以住響呢度~
唔講咁多, 大家睇下相就知~~
或者去佢地個網www.thetango.com.tw

繼以前scary movie系列新作
都係將一堆戲0既內容改頭換面變成攪笑版
本身想諗住搵套笑下0既戲
不過唔係套套所提及0既戲都有睇過, 所以有d野唔係好明
如果只係想輕鬆下, 呢套選擇都可以0既~

相關網站: imdb

估唔到咁快可以睇完第一本書
因為呢本好少字, 以圖為主
所以先睇得咁快
呢個illustrator畫d野個風格好灰(我指顏色上)
帶出黎個效果都算ok
不過可能畫功真係要落多d苦功~
故事上好簡單, 就係講一d佢自己0既經歷
比較得意係佢講0既”西藏烏繩”
唔知真定假架呢? 如果係真都ok得意~~

King Ludwig Beehall係食德國菜0既餐廳
響Murray House度食, 一面望個海
一面響返岸邊, 其實幾舒服又幾靚~
食左個potato cakes, 幾好食呀~ 係個鴨胸爭dd
而個sausage, 幾好呀, 不過原來一人一條好短短0既都好飽
攪到個羊扒食唔到呀~
整體野食同service都ok
最攪笑係附近幾張台都係生日飯…